الرئيسية آخرالاخبار أخبار عربية أخبارك ألبومات الرأى الرئيسية الصفحة الأدبية بـأقلـام الـقـراء بأقلامهم شعر وشعراء صحافة عالمية صحافة محلية قراء كتابنا
فعلا ياريت …فين زمان واللمّه دايما هيّ عنوان كل بيت…قصيدة للشاعرةالمصرية: مرفت جابر
الإثنين 17-10-2022 22:08
فين زمان واللمّه دايما
هيّ عنوان كل بيت
صحبه حلوه
جيره حلوه
راكية الشاي وسط غيط
والطبالي ف كل ناحيه
للغريب قبل القريب
للجميع دايما نصيب
م الكرم والخير زياده
كله حاسس بالسعاده
والطبيعي ف كل حتّه
تلقى أجمل ما اشتهيت
والبيوت مفتوح ببانها
كل بيت ملك الجميع
البنات ورد الربيع
والولاد شمس النهار
كان قلوب الناس عمار
والدفا مغطّي المكان
كل إحساس الأمان
بين وشوش دايما بتضحك
كل يوم ف عيونها عيد
والحكايات الكتيره
من كبار القعده لمّا
بيقولوها ف كل سهره
كل قِصّه وفيها عِبره
توصل العقل البسيط
والنهارده حاجات كتيره
من قلوب الخلق ضاعت
ريحة الماضي وجماله
إللي بين أيامنا تاهت
والقلوب دلوقتي باتت
نايمه فوق أحزان سنينها
والبيوت مقفول ببانها
والجميع ضد الجميع
لا البنات ورد الربيع
والولاد ما بقوش نهار
جنّة الماضي الجميله
أصبحت دلوقتي نار
قد إيه طعم المرار
بيقابلني ف كل ثانيه
لمّا عقلي يشت منّي
يستعيد م الذكرى صوره
فيها معنى لدنيا تانيه
من ليالي جميله فاتت
أصبحت دلوقتي ماضي
قد أيه نفسي الساعه دي
ترجع الصوره اللي كانت
يرجع العطر اللي كان
ساعه من أيام زمان
عند أوّل ما ابتديت
النهارده باقول ياريت
وقفت الساعه القديمه
بالزمن عند الطفوله
لمّا كان شعري بفيونكه
والبنات دايما خجوله
والسحاب يرمي الحموله
يبقى خيره ف كل ناحيه
يبقى طعمه ف كل بيت
قد إيه فعلا ..
ياريت.
اضف تعليق
