كتب/أحمدالعجماوي

لو لسه طفلك في أول ٦ شهور من عمره يبقى من الأفضل متصوميش لأنه بيكون معتمد اعتماد كلي على الرضاعة لكن لو بعد كده ممكن تصومي بس هتخلي بالك ..

في الأول لازم نعرف إن الصيام في البداية مبيأثرش على اللبن لكن مع الوقت لو جسمك بيتعرض لجفاف شديد فطبيعي كمية اللبن والدهون اللي فيه هتقل وهتلاقي الطفل مبقاش يشبع زي الأول و ده هيظهر في عدد حفاضات أقل عن قبل رمضان ولون البراز غامق والطفل مقريف وبيعيط كتير بعد الأكل .

وهنا يبقى طالما إنك قررتي تصومي يبقى لازم تتبعي نظام غذائي يحافظ على ادرار ودسامة اللبن فهتشربي سوايل على أد ما تقدري مية ولبن وعصير سكر قليل وهتاكلي وجبة متكاملة على الفطار رز أو بطاطس أو مكرونة مع بروتين زي لحمة أو فراخ أو سمك ،والسحور يفضل فول وبيض . وطبعاً اهتمي بالسلطات على الفطار والسحور ومابينهم هتتسلي بأي حاجة في طريقك . وكلي مكسرات نوع واحد كل يوم ٣ -٤ حبات فول سوداني ،فستق،لوز عشان تحافظي على الدهون الصحية في اللبن وتاخدي مكمل غذائي عشان باقي المعادن المهمة زي الزنك والبوتاسيوم.

وحاولي تقعدي في مكان درجة حرارته مناسبة وتأجلي شغل البيت لبعد الفطار عشان تحافظي على نسبة المية اللي في جسمك .

ووقت الرضاعة رضعي طفلك رضعات طويلة من ١٠ دقايق لربع ساعة عشان تضمني إنه شبع ووصل لآخر الرضعة اللي فيها الدهون مش مجرد مية شربها واهتمي بالتبديل بين الثديين.

وطبعاً لو حسيتي بإعياء أو إغماء زغللة في العين زيادة في ضربات القلب أثناء الرضاعة هتفطري ومعاكي رخصتك وهتعوضي صيامك في وقت تاني.